El Shaarawy rikthehet te Genoa pas 16 vitesh, do të drejtohet nga De Rossi

Stephan El Shaarawy është pranë rikthimit te Genoa, klub ku nisi karrierën e tij në futbollin profesionist.

Sulmuesi 33-vjeçar ka arritur marrëveshje me klubin italian dhe, pasi ishte larguar nga Roma si lojtar i lirë, pritet të rikthehet në skuadrën ku u formua si futbollist. Për të, marrëveshja parashihet të jetë për një vit, me mundësi vazhdimi edhe për një sezon tjetër.

El Shaarawy u rrit në akademinë e Genoas dhe debutoi në Serie A në vitin 2008, në ndeshjen ndaj Chievos, nën drejtimin e Gian Piero Gasperinit. Dy vjet më vonë u largua nga klubi, ndërsa më pas ndërtoi një karrierë që e çoi te Milani, Monaco, Roma dhe Shanghai Shenhua.

Tash, 16 vjet pas largimit, “Faraoni” do ta veshë sërish fanellën kuqezi. Në Genoa ai do të ketë edhe një ribashkim të veçantë me Daniele De Rossin, me të cilin ka qenë bashkëlojtar te Roma dhe që tani është trajner i skuadrës nga Genova.

Zyrtarizimi nga Genoa pritet së shpejti, ndërsa El Shaarawy mund të jetë në dispozicion të De Rossit për ndeshjet e ardhshme.

Sinjali – aty ku e vërteta flet para lajmit!

/GazetaSinjali/