1 javë më parë
Punëtorë të Ndërmarrjes Publike Banesore (NPB) janë mbledhur sot më 05.10.2026 para objektit të Komunës së Prishtinës për të protestuar lidhur me mos-ekzekutimin e pagave.
Sipas njoftimit të tyre, që tash e dy muaj, rreth 380 punëtorëve të kësaj ndërmarrje nuk u janë ekzekutuar pagat mujore.
Këta të fundit paralajmëruan edhe ndërprerje të shërbimeve në rast se kërkesa e tyre nuk përmbushet.
Organizatori i protestës, Xhevat Prebreza tha se çdo punëtorë i kësaj ndërmarrje është duke u përballur me vështirësi të qirave të larta, faturave të energjisë, shpenzimeve të ushqimit e nevojave të përditshme.
Sipas tij, për institucionet paga mund të jetë vetëm një çështje administrative, por për punëtorët e NPB-së është buka e familjes dhe siguria e jetesës së tyre.
“Çdo punëtorë ka familje, ka fëmijë që presin të ushqehen, prindër që kanë nevojë për përkujdesje dhe obligime që nuk mund të presin. Qiraja e lartë, faturat e rrymes elektrike, shpenzimet e ushqimit dhe nevojat e përditshme, faturat tjera dhe pagesat e qerdheve, kredit bankare, ku çdo i dyti është me obligime, shkollimi i fëmijëve dhe pagesat e transportit, nuk mund të shtyhen pafundësisht. Për institucionet, paga mund të jetë një çështje administrative, por për ne, kjo pagë është buka e familjes dhe siguria e jetesës së përditshme.” – theksoi ai.
Prebreza deklaroi se nuk janë duke kërkuar as mëshirë e as lëmoshë, por po kërkojnë të drejtën e tyre elementare.
“Po kërkojmë vetëm të drejten tonë elementare, marrjen e pagesës mujore që e kemi fituar me djersën tonë.” – u shpreh ai.
Prebreza kërkoi nga Komuna e Prishtinës dhe kryetari i kësaj të fundit, Përparim Rama, që të gjejë zgjidhje për pagat e këtyre punëtorëve.
Ai po ashtu kërkoi edhe nga Gjykata Supreme që ta përshpejtojë më urgjencë lëndën e tyre.
“Duke pasur parasysh që Komuna e Prishtinës, është aksionare 100% e NPB-së, kërkojmë publikisht nga kryetari z. Përparim Rama, që të ushtrojë autoritetin e tij institucional për të mbështetur fuqishëm në zgjidhjen e këtyre sfidave jetike për punëtorët dhe NPB-në. Ndaj kërkojmë edhe nga Gjykata Supreme, që ta përshpejtojë me urgjencë lënden tonë, për të vetmen arsye, që 380 punëtorët t’i marrin pagat e tyre.” – deklaroi ai.
Në rast se nuk përmbushen kërkesat e tyre, Prebreza paralajmëroi ndërprerje të të gjitha shërbimeve që kjo ndërmarrje kryen.
“Po ashtu i njoftojmë qytetarët, se përderisa vazhdon kjo gjendje e mos marrjes së pagave, jo me dëshiren tonë, ne do t’i ndërpresim të gjitha shërbimet tona. Pagat tona nuk janë privilegj. Puna jonë nuk është lëmoshë. Dinjiteti ynë nuk është për bisedime.” – tha ai.
Ndërkohë që lidhur me këtë, KALLXO.com ka kontaktuar Komunën e Prishtinës për të kërkuar më shumë sqarime rreth çështjes së pagave për punëtorët e kësaj ndërmarrje dhe është në pritje të përgjigjes.
Ndërmarrja Publike Banesore (NPB), më 29.08.2026 pati njoftuar se llogaritë e saj bankare janë bllokuar në kuadër të një procedure përmbarimore që lidhet me kontestin gjyqësor për projektin në lagjen “Lakërishtë”.
Sipas NPB-së, kontesti lidhet me një kontratë të lidhur në maj të vitit 2021 nga administrata e kaluar, për të cilën ndërmarrja pretendon se “dëmton interesin publik”.
NPB-ja patën bërë të ditur se e kanë kundërshtuar vendimmarrjen në të gjitha instancat juridike dhe më 24.06.2026 ka ushtruar revizion në Gjykatën Supreme të Kosovës.
Kryetari i Prishtinës, Përparim Rama në një konferencë për media, më 29.08.2026, pati sqaruar çështjen e Ndërmarrjes Publike Banesore (NPB) dhe kontratës së lidhur në vitin 2021 me një kompani që tha se ishte formuar vetëm një javë para shpalljes publike, në një proces që ka qenë i hapur vetëm për tri ditë.
Sipas kryetarit Rama, i gjithë procesi në këtë rast ishte iniciuar dhe zhvilluar më 2021, kohë në të cilën thotë se Prishtina ishte e qeverisur nga Lëvizja Vetëvendosje.
“Saktësisht, më 27 prill 2021 është marrë vendimi. Më 17 maj 2021 është nënshkruar kontrata. Më 16 gusht 2021 është lëshuar leja e ndërtimit. Më 5 tetor 2021 është nënshkruar Aneks-Kontrata. Pra, ne as nuk e kemi inicuar, as negociuar dhe as nënshkruar këtë kontratë. Përgjegjësia për këto vendime i takon qeverisjes para nesh në Prishtinë. Janë vendimet me data, me nënshkrime, me emra dhe mbiemra!” – pati shkruar Rama në Facebook, më 29.08.2026.
E Gëzim Sveçla, shef i asamblistëve të Lëvizjes Vetëvendosje në Prishtinë, ka thënë për KALLXO.com se “janë krejtësisht të pavërteta dhe të pasakta pretendimet e zotit Rama që kontrata për Ndërmarrjen Publike Banesore me operatorët privatë ka ndodhur gjatë qeverisjes së Lëvizjes Vetëvendosje në kryeqytet.
”Sveçla ka shpjeguar se kryetari i atëhershëm i Prishtinës, Shpend Ahmeti, ka dhënë dorëheqje nga LVV në mars të vitit 2018.“Prej vitit 2018, Lëvizja Vetëvendosje ka qenë e vetmja opozitë në Prishtinë. Do të thotë të gjitha subjektet tjera politike në një kohë apo në një mënyrë kanë qenë në pushtet bashkë me Shpend Ahmetin, PSD-në [Partinë Socialdemokrate], LDK-në, PDK-në, AAK-në, vetëm Lëvizja Vetëvendosje ka qenë subjekti opozitar gjatë atij mandati.” – pati thënë Sveçla.
