Cigaret do bëhen edhe më të shtrenjta në Gjermani - ja sa pritet të kushtojë një pako

Gjermania po planifikon rritjen graduale të taksave për duhanin, me ç’rast çmimi i një pakoje standarde cigaresh pritet të arrijë në 12 euro deri në vitin 2030.

Qeveria synon të mbledhë 12 miliardë euro shtesë gjatë katër vjetëve nga kjo masë.

Aktualisht, një pako me 20 cigare në Gjermani kushton mesatarisht rreth 8.05 euro.

Sipas planit të miratuar nga Bundestagu, çmimet do të rriten gradualisht gjatë viteve të ardhshme.

Çmimet e parashikuara janë:

2027: 8.77 euro për pako

2028: 9.56 euro për pako

2029: 10.42 euro për pako

2030: 11.36 euro për pako

Disa marka premium mund të kushtojnë deri në 14 euro për pako.

Me këto ndryshime, çmimet në Gjermani do t’u afrohen atyre në disa vende të tjera evropiane, megjithëse pritet të mbeten më të ulëta se në Irlandë, Francë dhe Holandë.

Qeveria synon 12 miliardë euro shtesë

Me rritjen e planifikuar, qeveria gjermane synon të shtojë të hyrat nga taksat e duhanit me rreth 12 miliardë euro gjatë katër vjetëve.

Të hyrat shtesë pritet të arrijnë rreth 1.5 miliardë euro në vitin 2027, ndërsa deri në vitin 2030 parashikohet të rriten në 4.5 miliardë euro. Vitin e kaluar, shteti gjerman mblodhi 17.6 miliardë euro nga taksat për duhanin.

Megjithatë, industria e duhanit dyshon se qeveria do t’i arrijë këto objektiva.

Përfaqësuesit e saj paralajmërojnë se çmimet më të larta mund t’i shtyjnë duhanpirësit drejt tregut të zi ose drejt blerjes së cigareve më të lira nga vendet e tjera të Bashkimit Evropian.

Kjo mund të godasë veçanërisht shitësit që operojnë ligjërisht.

Deputeti i CDU-së, Carsten Brodesser, kërkoi rritje më të moderuara, duke paralajmëruar se shtrenjtimi i madh mund të ulë të hyrat tatimore dhe të dëmtojë tregtinë e ligjshme të duhanit. Megjithatë, propozimi i tij nuk u miratua.

Synohet edhe ulja e konsumit të nikotinës

Gjatë debatit në Bundestag, deputeti socialdemokrat Ingo Vogel pranoi se reforma synon pjesërisht edhe balancimin e buxhetit, por theksoi se ka gjithashtu objektiva shëndetësore.

Sipas tij, synimi është që produktet e nikotinës të bëhen më pak tërheqëse për konsumatorët.

Tatimet për purot dhe cigarilot nuk do të rriten aq shumë sa ishte planifikuar fillimisht, ndërsa taksat për lëngjet e cigareve elektronike u rritën pak më shumë se sa pritej.

Vogel tha se autoritetet po i marrin seriozisht paralajmërimet e doganave për rrezikun e zgjerimit të tregut të zi.

Sipas tij, rritja e tregtisë së paligjshme do të nënkuptonte humbje financiare për shtetin dhe më shumë hapësirë për rrjetet kriminale.

Partitë politike janë të ndara lidhur me reformën. Partia e ekstremit të djathtë AfD dhe Die Linke votuan kundër, ndërsa të Gjelbrit mbështesin parimisht taksat më të larta për duhanin, por konsiderojnë se rritjet e planifikuara janë tepër të vogla.

Rreth 131 mijë vdekje nga duhani brenda një viti

Raportohet se rreth 19 për qind e personave mbi moshën 15-vjeçare në Gjermani pinë duhan. Prej tyre, 14 për qind e konsumojnë rregullisht, ndërsa 5 për qind vetëm herë pas here.

Qendra Gjermane për Kërkimin e Kancerit vlerëson se rreth 131 mijë persona vdiqën në vitin 2023 nga sëmundje të lidhura me duhanin.

Ekspertët shëndetësorë e konsiderojnë rritjen e çmimeve një nga mënyrat efektive për t’i nxitur njerëzit ta lënë duhanin dhe për të parandaluar fillimin e konsumit, veçanërisht te të rinjtë.

Hapi i radhës është votimi në Bundesrat, dhomën e përfaqësimit të landeve gjermane. Sipas raportimit, reforma pritet të miratohet, pasi aktualisht nuk parashikohen kundërshtime. /Telegrafi/