Canolli: Është dhënë leja për ndërtimin e xhamisë në Shkabaj

Agron Canolli ka bërë të ditur se është dhënë leja për ndërtimin e xhamisë në Shkabaj të Prishtinës, pas një angazhimi dhe bashkëpunimi ndërmjet Bashkësisë Islame dhe Komunës së Prishtinës.

Përmes një postimi në Facebook, Canolli e ka cilësuar këtë si lajm të mirë për banorët e Shkabajt dhe besimtarët myslimanë, duke theksuar se kërkesa për ndërtimin e xhamisë ka qenë e kahershme.

“Sot, në Ditën e Xhumasë, një lajm i mirë për Shkabajin! Pas një angazhimi të gjatë, pune dhe bashkëpunimi ndërmjet Bashkësisë Islame dhe Komunës së Prishtinës, sot u dha leja për ndërtimin e xhamisë në Shkabaj”, ka shkruar Canolli.

Ai ka theksuar se dita e së premtes është një moment i veçantë për ta ndarë këtë lajm me besimtarët myslimanë.

“Nuk ka ditë më të bukur për ta ndarë këtë lajm sesa Dita e Xhumasë, ditë e veçantë për besimtarët myslimanë, ditë e lutjes, bashkimit dhe shpresës”, ka deklaruar ai.

Canolli e ka vlerësuar dhënien e lejes si një hap të rëndësishëm për komunitetin e Shkabajt, duke shprehur urimet e tij për banorët dhe besimtarët.

“Një kërkesë e kahershme po merr rrugë drejt realizimit, duke dëshmuar se me vullnet, bashkëpunim dhe angazhim, punët e mira bëhen realitet”, ka shkruar ai.

Në fund, Canolli ka uruar që xhamia e re të shërbejë si vend adhurimi dhe bashkimi për komunitetin.

“Uroj që kjo xhami të bëhet vend i adhurimit, paqes, bashkimit dhe mirësisë për të gjithë”, ka përfunduar ai. /Telegrafi/