Baena e sheh Yamalin favorit për Topin e Artë: Është lojtari më i mirë në botë

Mesfushori i Atletico Madridit, Alex Baena, ka thënë se bashkëkombësi i tij Lamine Yamal duhet ta fitojë Topin e Artë për vitin 2026.

Në një intervistë për DAZN para derbit të Madridit, Baena ka treguar edhe tre favoritët e tij për çmimin prestigjioz individual.

“Për mua është e qartë. Tre të parët do të ishin Lamine, Rodri dhe Messi”, ka deklaruar Baena.

Ai e ka vendosur Yamal në krye, duke e cilësuar 19-vjeçarin si “lojtarin më të mirë në botë”.

“Rodri e tregoi nivelin e tij në Kupën e Botës – ishte lojtari më i mirë në Botëror. Ndërsa ajo që Messi ka bërë këtë sezon në moshën 39-vjeçare është diçka që shumë pak lojtarë do të mund ta arrinin”, ka shtuar ai.

Baena ka veçuar edhe aftësitë e Yamalit, duke thënë se gjatë grumbullimeve me Spanjën ka parë nga afër veprime që, sipas tij, nuk i bën asnjë futbollist tjetër.

“Është një nga të paktët lojtarë për të cilët i shikoj ndeshjet vetëm për ta parë duke luajtur. Kjo më ka ndodhur vetëm me Messin. Tani më ndodh e njëjta gjë me të”, ka thënë Baena.

Sipas tij, Yamal i kujton magjinë që dikur e kishte parë vetëm te Lionel Messi, duke e bërë atë një nga emrat kryesorë në garën për Topin e Artë të vitit 2026.

Sinjali – aty ku e vërteta flet para lajmit!

/GazetaSinjali/