2 javë më parë
Mediumi në gjuhën serbe “Vaseljenska.net” sot (13 maj) ka publikuar një artikull me titull “Aterimi i “Ruslan”-it në Prishtinë është vazhdim i armatosjes në kuadër të paktit ushtarak trepalësh të Kroacisë, Shqipërisë dhe të ashtuquajturës Kosovë”.
Në artikull pretendohet se një aeroplan i madh transportues ushtarak kishte mbërritur në Kosovë javën e kaluar direkt nga baza ushtarake gjermane në Wunstorf dhe se Ministria gjermane e Mbrojtjes e kishte konfirmuar këtë informacion për portalin “Vaseljenska”, duke theksuar se Gjermania, si parim, nuk komenton transportet ushtarake.
“Ju lutemi të kuptoni se ne nuk komentojmë për transportet ushtarake si çështje parimore, pavarësisht nga çështja specifike. Ky nuk është as konfirmim dhe as mohim”.
Çka nuk shkon me këtë artikull?
Pavarësisht se përgjigjja e Ministrisë gjermane nuk përbën as konfirmim dhe as mohim për pretendimet e ngritura, mediumi në fjalë e interpreton atë si përforcim të dyshimeve të veta se bëhej fjalë për një “operacion logjistik të sinkronizuar”.
Më tej, artikulli pretendon pa ofruar asnjë fakt apo dëshmi se aterimi i aeroplanit transportues ushtarak “Ruslan” lidhet me zhvillimin e nismës për bashkëpunim ushtarak mes Kosovës, Shqipërisë dhe Kroacisë, e cila u nënshkrua më 18 mars 2025.
FAKTET
Çka dihet për aeroplanin “Antonov An-124 Ruslan” që ateroi më 6 maj në Aeroportin e Prishtinës?
Fillimisht, fotografi kosovar Arian Mavriqi kishte xhiruar aterimin e këtij aeroplani (6 maj) në Aeroportin e Prishtinës (shih këtu).
Më pas, misioni paqeruajtës i NATO-s, KFOR, konfirmoi më 8 maj për Radion Evropa e Lirë (REL) se njëri prej aeroplanëve më të mëdhenj në botë për transportin e mallrave, “transportoi materiale mbështetjeje logjistike për kontingjentin gjerman” në këtë mision.
Paraprakisht, Ministria e Mbrojtjes e Gjermanisë i kishte thënë REL-it se, “si çështje parimore dhe pavarësisht nga pyetja specifike, nuk komenton transportet ushtarake”, si dhe përgjigjja e saj nuk përbën as konfirmim e as mohim në lidhje me këtë fluturim.
Kjo ministri, megjithatë, tha se forcat e armatosura gjermane përdorin shërbimin e transportit të kompanisë Antonov.
“Kapacitetet e Antonov Logistics SALIS GmbH [përdoren] për dërgimin dhe furnizimin e forcave gjermane në kontekstin e mbrojtjes kombëtare dhe mbrojtjes së aleancës, menaxhimit të krizave ndërkombëtare dhe menaxhimit të rreziqeve dhe krizave kombëtare”, i tha REL-it një zëdhënës i Ministrisë gjermane të Mbrojtjes.
Pra, bazuar në deklaratat nga burime kredibile, aterimi i këtij aeroplani nuk ndërlidhet në asnjë rast me vazhdimin e armatosjes në kuadër të bashkëpunim ushtarak mes Kosovës, Shqipërisë dhe Kroacisë, siç pretendohet nga mediumi në gjuhën serbe “Vaseljenska.net”.
Marrëveshja Kosovë – Shqipëri – Kroaci
Marrëveshja për bashkëpunim ushtarak një karakter thelbësisht mbrojtës dhe standardizues, e bazuar në 4 shtylla kryesore: (shih këtu).
- Nxitja e kapaciteteve mbrojtëse dhe bashkëpunimi për industrinë përkatëse;
- Rritja e ndërveprueshmërisë përmes edukimit, trajnimeve dhe ushtrimeve;
- Luftimi i kërcënimeve hibride dhe rritja e qëndrueshmërisë;
- Ofrimi i mbështetjes së plotë për integrimin euroatlantik.
Analiza
Mediumi serb “Vaseljenska.net” pretendon se aterimi i aeroplanit transportues “Antonov An-124 Ruslan” në Aeroportin e Prishtinës lidhet me vazhdimin e armatosjes në kuadër të bashkëpunimit ushtarak mes Kosovës, Shqipërisë dhe Kroacisë.
Megjithatë, ky pretendim nuk mbështetet në asnjë fakt apo dëshmi.
Deklaratat nga Ministria gjermane e Mbrojtjes dhe KFOR-I dhënë për REL-in, tregojnë se aeroplani kishte transportuar materiale logjistike për kontingjentin gjerman në kuadër të misionit të NATO-s në Kosovë.
Pra, asnjë burim kredibil nuk e mbështet pretendimin se ky fluturim lidhet me ndonjë aleancë apo pakt ushtarak rajonal.
Bazuar në metodologjinë e punës, hibrid.info e vlerëson këtë përmbajtje si “Manipulim i fakteve”.
Arsyetimi
Vlerësimin si “Manipulim i fakteve” marrin ato përmbajtje informative që përdorin fakte të njohura si të sakta, por i interpretojnë ato në mënyrë të shtrembëruara. Këto raporte zakonisht përdorin informacion të saktë për të nxjerrë përfundime ose pretendime të pasakta, duke drejtuar kështu përfundimet e konsumatorëve të përmbajtjes së mediave në drejtim të gabuar në lidhje me kuptimin aktual të fakteve të paraqitura.
