Arsenali në telashe para ndeshjeve vendimtare, pesë lojtarë kyç mungojnë në stërvitje

Përgatitjet e Arsenalit për një javë vendimtare të sezonit janë tronditur, pasi pesë lojtarë kyç munguan në stërvitjen e së martës, vetëm një ditë para sfidës së rëndësishme në Ligën e Kampionëve.

“Topçinjtë” përballen të mërkurën mbrëma me Sportingun në ndeshjen e kthimit të çerekfinales, ndërsa të dielën i pret derbi i madh i Premier League ndaj rivalëve për titull, Manchester Cityt.

Në seancën e fundit stërvitore nuk u paraqitën Riccardo Calafiori, Martin Odegaard, Declan Rice, Bukayo Saka dhe Jurrien Timber, duke rritur shqetësimet në prag të dy ndeshjeve vendimtare.

Nga këta, vetëm Rice ishte aktiv në humbjen 1-2 ndaj Bournemouthit në kampionat, ku luajti gjatë gjithë takimit. Mungesa e tij në stërvitje nuk nënkupton domosdoshmërisht se do të mungojë ndaj Sportingut, por mbetet një sinjal shqetësues për stafin teknik.

Trajneri Mikel Arteta nuk dha detaje konkrete për gjendjen e mesfushorit, duke theksuar se gjithçka do të vendoset në momentet e fundit.

“Nuk dua të hyj në këtë çështje. Duhet të presim dhe të shohim se si është situata, por ai nuk ka qenë në gjendje të stërvitet”, u shpreh Arteta.

I pyetur për mungesat e tjera, ai shtoi: “Do të duhet të presim deri nesër në mëngjes për të parë se si është situata me disa nga djemtë”.

Calafiori, Odegaard, Saka dhe Timber kanë munguar edhe javët e fundit, ndërsa Calafiori ishte aktivizuar si zëvendësues në humbjen ndaj Southamptonit (1-2) në çerekfinale të FA Cup.

Megjithatë, ka edhe lajme pozitive për londinezët, pasi Piero Hincapie dhe Eberechi Eze u stërvitën normalisht dhe pritet të jenë në dispozicion. Të dy ishin në stol ndaj Bournemouthit, me Eze që u aktivizua në minutën e 54-të.

Arsenali hyn në ndeshjen e kthimit me epërsinë 1-0 nga takimi i parë në Lisbonë, falë golit të Kai Havertz në kohën shtesë.

Pas humbjes së fundit në kampionat, Arteta u ka kërkuar lojtarëve më shumë forcë dhe shpirt luftarak në këtë fazë vendimtare të sezonit, ku skuadra po lufton për dy trofe.

Sinjali – aty ku e vërteta flet para lajmit!

/GazetaSinjali/