Ancelotti i përgjigjet Laportës për Raphinhan: Brazili nuk merr kërkesa nga klubet

Përzgjedhësi i Brazilit, Carlo Ancelotti, i është përgjigjur kritikave të presidentit të Barcelonës, Joan Laporta, lidhur me grumbullimin e Raphinhas për ndeshjet e nëntorit.

Laporta kishte shprehur shqetësimin për gjendjen fizike të sulmuesit brazilian dhe ngarkesën që udhëtimet e gjata me kombëtaren mund t’i shkaktojnë atij, veçanërisht pas lëndimit të pësuar në shtator.

Megjithatë, Ancelotti bëri të qartë se federata braziliane nuk ka marrë ndonjë kërkesë të veçantë nga Barcelona dhe se vendimet për grumbullimin e futbollistëve merren në bazë të nevojave të kombëtares.

“Nuk kemi kërkesa të veçanta dhe as nuk kemi nevojë për to. Gjatë periudhave të ndeshjeve ndërkombëtare do të ftojmë futbollistët që i konsiderojmë të rëndësishëm për kombëtaren e Brazilit”, deklaroi Ancelotti.

Raphinha është përfshirë në listën e Brazilit për dy miqësoret e nëntorit, kundër Japonisë më 14 nëntor dhe Singaporit më 17 nëntor, të dyja të planifikuara të zhvillohen në Singapor.

Sipas gazetës spanjolle Sport, sulmuesi i Barcelonës do të përshkojë rreth 22 mijë kilometra vajtje-ardhje për këto dy takime.

Ndërkohë, Ancelotti bëri të ditur se për klubet braziliane që janë në garë për titull ka pasur një qasje tjetër, duke mos grumbulluar futbollistë nga Flamengo dhe Palmeiras për shkak të rëndësisë së ndeshjeve vendimtare në kampionatin vendas.

Sinjali – aty ku e vërteta flet para lajmit!

/GazetaSinjali/