2 javë më parë
Mbrojtësi i Kombëtares së Kosovës, Albian Hajdari, ka reaguar pas lëndimit që e ka detyruar të rikthehet në Gjermani për të vijuar procesin e rikuperimit.
Hajdari ka shprehur keqardhjen për mungesën e tij në ndeshjet e ardhshme të Kosovës, duke thënë se për të është veçanërisht e vështirë të mos jetë në fushë me bashkëlojtarët në një moment kur Kombëtarja po garon për objektivat e saj.
“Sot më dhemb jo vetëm lëndimi, por edhe mendimi se nuk do të jem në fushë me Kosovën në ndeshjet e ardhshme. Për fat të keq, duhet të kthehem në Gjermani për t’u rikuperuar. Lëndimi fizik është një dhimbje më vete, por të mungosh kur e di se ekipi po lufton për Kosovën… kjo dhemb edhe më shumë”.
Ai ka thënë se do të dëshironte të ishte në fushë me ekipin dhe të kontribuonte për fanellën e Kosovës, teksa ka shprehur krenarinë për skuadrën dhe rezultatet e arritura deri tani.
“Do të doja të isha aty, bashkë me ju, duke luftuar për çdo top, për çdo minutë dhe për këtë fanellë që për mua do të thotë gjithçka. Megjithatë, jam dhe do të jem gjithmonë krenar për këtë ekip dhe për gjithçka që kemi arritur deri tani. Kemi treguar karakter, kemi luftuar së bashku dhe kemi bërë që Kosova të jetë aty ku meriton të jetë”, ka shkruar Hajdari.
Sinjali – aty ku e vërteta flet para lajmit!
