Alarm në Australi pasi një “kamerë e fshehtë” u gjet në kabinën e një anijeje të marinës

Forcat e Mbrojtjes së Australisë (ADF) kanë konfirmuar se një pajisje e fshehtë për regjistrim video është gjetur në kabinën e një anijeje të marinës australiane.

Pajisja u gjet të dielën në kabinën e anijes së Marinës Mbretërore Australiane, HMAS Leeuwin, në Cairns të Queensland-it, shkruajnë mediat e huaja, përcjell Telegrafi.

Konfirmimi erdhi pasi senatorja e pavarur australiane Jacqui Lambie – ish-ushtarake dhe mbrojtëse e çështjeve të mbrojtjes – deklaroi në parlament se ishte kontaktuar nga personel që pretendonte se "kamera të fshehura ishin gjetur së fundmi në ambientet e dusheve për marinarët femra".

Departamenti i Mbrojtjes së Australisë nuk ka bërë të ditur nëse pajisja ishte gjetur në një hapësirë të rezervuar vetëm për femra dhe njoftoi se incidenti i ishte referuar Njësisë së Përbashkët të Policisë Ushtarake.

Të mërkurën, Lambie i tha Senatit Australian: "Më thanë gjithashtu se kjo kishte ndodhur së fundmi dhe kishte penguar anijen të nisej në lundrim ndërkohë që hetimet ishin në vazhdim. Edhe më shqetësuese janë pretendimet se pamjet nga këto kamera mund të jenë publikuar në internet para se kamerat të zbuloheshin”.

"Sa prej marinarëve tona femra janë regjistruar pa e ditur, në momentet e tyre më intime? Sa pamje janë shpërndarë në internet deri më tani, janë ruajtur apo publikuar pa dijeninë apo pëlqimin e tyre? Këto janë pyetjet që i drejtoj sot marinës".

Më vonë gjatë së mërkurës, Departamenti i Mbrojtjes konfirmoi se ishte vënë në dijeni për gjetjen e një pajisjeje regjistrimi video në një kabinë të anijes HMAS Leeuwin, por nuk dha detaje specifike se ku ishte zbuluar ajo.

"Departamenti i Mbrojtjes e trajton këtë incident me seriozitet të lartë dhe nuk toleron sjellje të papranueshme në asnjë formë", thuhej në deklaratën e departamentit.

"Anija qëndroi e ankoruar për të mundësuar hetimin dhe për të garantuar ofrimin e mbështetjes së menjëhershme për anëtarët e ekuipazhit. Mirëqenia e individëve mbetet prioritet për Mbrojtjen dhe mbështetja po vazhdon”.

"Meqenëse çështja është aktualisht nën hetim dhe për të mbrojtur privatësinë e individëve të përfshirë, Departamenti i Mbrojtjes nuk mund të japë komente të mëtejshme në këtë moment". /Telegrafi/