1 ditë më parë
Banorët e Shtrubullovës në Drenas vazhdojnë të përballen me vështirësi në qarkullim për shkak të mbylljes së urës në rrugën “Agron Mehmeti”, e cila u dëmtua nga vërshimet e janarit. Ndonëse për ndërtimin e saj janë paraparë mbi 362 mijë euro, ende nuk dihet se kur do të nisin punimet.
Në një përgjigje për KosovaNews, Komuna e Drenasit ka bërë të ditur se financimi i projektit është paraparë përmes një memorandumi të mirëkuptimit me Ministrinë e Infrastrukturës dhe Transportit (MIT). Sipas komunës, mjetet buxhetore janë ndarë dhe ekziston zotimi financiar edhe nga ministria.
Megjithatë, projekti ende ndodhet në fazën e prokurimit, ndërsa komuna nuk ka dhënë një datë konkrete për fillimin e punimeve.
“Është iniciuar procedura në Zyrën e Prokurimit, është në shpallje publike. Nuk mund të parashihet fillimi i punimeve derisa të lidhet kontrata për arsye të procedurave të prokurimit publik, duke marrë parasysh edhe ankesat”, thuhet në përgjigjen e komunës për KosovaNews.
Të dhënat e publikuara në platformën e-prokurimi tregojnë se vlera e përgjithshme e projektit është 362 mijë e 50 euro. Nga kjo shumë, 200 mijë euro janë planifikuar për vitin 2026, ndërsa 162 mijë e 50 euro për vitin 2027. Projekti është planifikuar të realizohet gjatë periudhës 2026–2027.
Sipas dokumentacionit të tenderit, afati për dorëzimin e ofertave është caktuar më 30 tetor 2026. Megjithatë, dokumentacioni i tenderit dhe planifikimi buxhetor nuk përcaktojnë vetvetiu një datë konkrete për nisjen e punimeve, të cilën komuna ende nuk e ka bërë të ditur.
Pavarësisht mjeteve të planifikuara për ndërtimin e urës, banorët vazhdojnë të përdorin rrugë alternative për të arritur në Drenas. Deri në lidhjen e kontratës dhe nisjen e punimeve, ata mbeten pa një afat të qartë për rikthimin e saj në funksion.
